وبيسألوا الجبن اللى كانن
جوه قلوبنا من زمان
مش كنت لابد ف الخرس ؟
مش كنت مقطوع اللسان ؟
مش كنت مكفى ع المظالم مبتسم
بتدارى دمعك وسط دمع الطيبين
طالع لمين ؟
ياللى ابوك قضى حياته انتباه
وسط الامانى المكسورين
وامك تبيع سنم الفرح
يمكن تعيشوا مستورين
طالع لمين ؟
صوتك طلع بالاغنيات
على بكره مفروش بالحنين
صدرك قصاد المنجنيق
واقف رصين
جبت التناحه دى منين ؟
مش كنت بتلم
النجاح
اللى اتسرق
مش كنت خايف م الغرق
وسط الجبال
ازاى بقيت تقدر تقول
ازاى ما خفتش م المغول
ولا التتر
ولا المواجع والسفر
ازاى مخفتش م الدقون متدلدله
مربوطه بخناجر نفاق
وعقول سجينه مسلسله
فاكره الصلاه زى الخناق
ازاى قابلت المشنقه
بالتريقه ؟
امرك عجيب
ليست هناك تعليقات:
إرسال تعليق